శ్రీ కళ్యాణ వేంకటేశ్వర స్వామివారి పారువేట ఉత్సవం వైభవంగా నిర్వహించిన టీటీడీ

తిరుపతి, జూలై 20, 2026: శ్రీవారి మెట్టు సమీపంలోని శ్రీనివాసమంగాపురం శ్రీ కళ్యాణ వేంకటేశ్వర స్వామివారి ఆలయంలో వార్షిక పారువేట ఉత్సవం సోమవారం అత్యంత వైభవంగా నిర్వహించారు.

శ్రీవేంకటేశ్వర స్వామివారు ఈ మార్గంలో సంచరించారనే విశ్వాసంతో ఈ ప్రాంతానికి ప్రత్యేక ఆధ్యాత్మిక ప్రాధాన్యం ఉంది.

ఘన ఊరేగింపు

ఉదయం 7 గంటలకు ఉత్సవమూర్తులను ఆలయం నుండి పారువేట మండపానికి వేదమంత్రోచ్ఛారణలు, మంగళ వాయిద్యాల నడుమ ఘనంగా తీసుకెళ్లారు. సంప్రదాయ పూజలు, నైవేద్యాల అనంతరం పారువేట ఉత్సవాన్ని నిర్వహించారు.

శూలం విసిరిన స్వామివారు

ఉత్సవంలో ప్రధాన ఆకర్షణగా శ్రీ స్వామివారు మూడు సార్లు శూలాన్ని విసరడం జరిగింది. ఈ కార్యక్రమం దుష్ట శక్తుల సంహారం, ధర్మ పరిరక్షణకు ప్రతీకగా నిర్వహిస్తారు. అనంతరం ఆస్థానం నిర్వహించి సాయంత్రం ఉత్సవమూర్తులను ఆలయానికి తిరిగి తీసుకువచ్చారు.

భక్తిరసాన్ని పంచిన సాంస్కృతిక కార్యక్రమాలు

టీటీడీ అన్నమాచార్య ప్రాజెక్టు కళాకారులు అన్నమయ్య సంకీర్తనలు ఆలపించగా, భజన బృందాలు భక్తి గీతాలు, కోలాటం ప్రదర్శించి భక్తులను ఆధ్యాత్మిక భావంలో ముంచెత్తాయి.

శ్రీవారి మెట్టు వద్ద భక్తులకు అన్నప్రసాదం పంపిణీ చేశారు.

పాల్గొన్న అధికారులు

ఈ కార్యక్రమంలో టీటీడీ జేఈఓ డాక్టర్ ఎ. శరత్, స్పెషల్ గ్రేడ్ డిప్యూటీ ఈఓ శ్రీమతి వరలక్ష్మి, ఏఈఓ శ్రీ గోపినాథ్, సూపరింటెండెంట్ శ్రీ రాజ్ కుమార్, ప్రధాన అర్చకులు శ్రీ బాలాజీ రంగాచార్యులు, దేవాలయ ఇన్‌స్పెక్టర్లు శ్రీ మునికుమార్, శ్రీ ధనశేఖర్ జయ, ఇతర అధికారులు, అర్చకులు మరియు పెద్ద సంఖ్యలో భక్తులు పాల్గొన్నారు.