అలిపిరి కాలినడక మార్గ భద్రతకు ఎమర్జెన్సీ రెస్పాన్స్ టీమ్ – ఎల్‌ఎన్‌ఎస్ ఆలయం వద్ద వైల్డ్‌లైఫ్ మానిటరింగ్ సెల్‌కు టీటీడీ ప్రతిపాదన

తిరుమల, జూలై 18, 2026: అలిపిరి మరియు శ్రీవారి మెట్టు కాలినడక మార్గాల్లో తిరుమలకు వచ్చే భక్తుల భద్రతకు అత్యున్నత ప్రాధాన్యత ఇవ్వాలని టీటీడీ అదనపు ఈవో శ్రీ చి. వెంకయ్య చౌదరి టీటీడీ, అటవీశాఖ అధికారులను ఆదేశించారు. ముఖ్యంగా చిరుతలు వంటి వన్యప్రాణుల నుంచి భక్తులను రక్షించే చర్యలపై విస్తృతంగా చర్చించారు.

ఎమర్జెన్సీ రెస్పాన్స్ టీమ్ ఏర్పాటు

వన్యప్రాణులకు సంబంధించిన అత్యవసర ఘటనలకు 5 నుంచి 10 నిమిషాల్లో స్పందించే ప్రత్యేక ఎమర్జెన్సీ రెస్పాన్స్ టీమ్ ఏర్పాటు చేయాలని ప్రతిపాదించారు.

ఈ బృందంలో:

• వెటర్నరీ వైద్యులు
• అటవీశాఖ సిబ్బంది
• శిక్షణ పొందిన అత్యవసర సిబ్బంది

ఉండగా, అవసరమైన వాహనాలు, కమ్యూనికేషన్ వ్యవస్థలు, పరికరాలు అందుబాటులో ఉంచనున్నారు.

చిరుతల సంచారం నమోదైన ప్రాంతాల్లో నిరంతర నిఘా కొనసాగించి, బోన్లలో చిక్కిన చిరుతలను దూరంలోని రక్షిత అటవీ ప్రాంతాలకు తరలించనున్నారు.

కాలినడక మార్గాలపై కొత్త ప్రతిపాదనలు

భక్తుల భద్రత దృష్ట్యా:

• అలిపిరి, శ్రీవారి మెట్టు మార్గాల్లో సాయంత్రం 6 గంటల వరకు మాత్రమే ప్రవేశం కల్పించే అంశాన్ని పరిశీలించాలని నిర్ణయించారు.
• కాలినడక మార్గంలోని దుకాణాలు వన్యప్రాణుల సంచారంపై చూపుతున్న ప్రభావాన్ని అధ్యయనం చేసి అవసరమైన నియంత్రణ చర్యలు తీసుకోనున్నారు.

ఎల్‌ఎన్‌ఎస్ ఆలయం వద్ద వైల్డ్‌లైఫ్ మానిటరింగ్ సెల్

శ్రీ లక్ష్మీనరసింహస్వామి (ఎల్‌ఎన్‌ఎస్) ఆలయం సమీపంలో ప్రత్యేక వైల్డ్‌లైఫ్ మానిటరింగ్ సెల్ ఏర్పాటు చేయనున్నారు.

ఈ కేంద్రంలో:

• వన్యప్రాణుల సంచారాన్ని రియల్‌టైమ్‌లో పర్యవేక్షించడం
• డిజిటల్ రికార్డుల నిర్వహణ
• ఘటనల విశ్లేషణ
• గత సంవత్సరాల వన్యప్రాణుల కదలికల అధ్యయనం
• ఆధునిక సాంకేతిక పరికరాలతో నిరంతర మానిటరింగ్

నిర్వహించబడుతుంది.

చెత్త నిర్వహణ, విభాగాల సమన్వయంపై దృష్టి

భక్తుల భద్రతను మరింత బలోపేతం చేయడానికి:

• అటవీ ప్రాంతాల్లో చెత్త నిర్వహణను మెరుగుపరచడం
• వన్యప్రాణులను ఆకర్షించే ఆహార వ్యర్థాలను తొలగించడం
• ప్రమాదకర ప్రాంతాల్లో హెచ్చరిక బోర్డులు ఏర్పాటు
• టీటీడీ అటవీ విభాగం, రాష్ట్ర అటవీ శాఖ, విజిలెన్స్, ఆరోగ్య, భద్రతా విభాగాల మధ్య సమన్వయాన్ని బలోపేతం చేయడం

పై నిర్ణయాలు తీసుకున్నారు.

ఈ సందర్భంగా టీటీడీ డిప్యూటీ కన్జర్వేటర్ ఆఫ్ ఫారెస్ట్స్ శ్రీ ఫణికుమార్ నాయుడు చిరుతల సంచారం, ట్రాప్ కెమెరాలు, సోలార్ కెమెరాలు, చేపట్టిన నివారణ చర్యలపై పవర్‌పాయింట్ ప్రజెంటేషన్ ఇచ్చారు.

సమావేశంలో చీఫ్ కన్జర్వేటర్ ఆఫ్ ఫారెస్ట్స్ శ్రీ శ్రీనివాస్ రెడ్డి, డీఎఫ్‌వో శ్రీ సాయిబాబా, టీటీడీ చీఫ్ ఇంజనీర్ శ్రీ సత్యనారాయణ, డిప్యూటీ ఈవో (హెల్త్) శ్రీ సోమనారాయణ, వీజీవో శ్రీ సురేంద్ర, ఇతర ఉన్నతాధికారులు పాల్గొన్నారు.