తిరుపతి, ఆగస్టు 16, 2026: టీటీడీ ఆళ్వార్ దివ్య ప్రబంధ ప్రాజెక్ట్ ఆధ్వర్యంలో శ్రీ వైష్ణవ ఆచార్యుల ఆధ్యాత్మిక సేవలపై మూడు రోజుల జాతీయ సదస్సును తిరుపతిలోని అన్నమాచార్య కళామందిరంలో ఆగస్టు 17 నుంచి 19 వరకు నిర్వహించనున్నారు.
ఈ సదస్సులో శ్రీ రామానుజాచార్యులు, ఆచార్య పుండరీకాక్షులు, శ్రీ గోవింద భట్టార్ (ఎంబార్), శ్రీ దాశరథి (ముదలియాండాన్) జీవితాలు, ఆధ్యాత్మిక సేవలతో పాటు విశిష్టాద్వైత తత్వ ప్రచారం, ఆలయ సంప్రదాయాలు, ఆచారాల పరిరక్షణలో వారి పాత్రపై చర్చించనున్నారు.
నాలుగు రాష్ట్రాల నుంచి 25 మంది పండితులు
ఈ జాతీయ సదస్సులో ఆంధ్రప్రదేశ్, తెలంగాణ, తమిళనాడు, కర్ణాటక రాష్ట్రాలకు చెందిన 25 మంది పరిశోధకులు, పండితులు పాల్గొని పరిశోధనా పత్రాలను సమర్పించనున్నారు.
శ్రీ వైష్ణవ సంప్రదాయం అభివృద్ధి, ఆచార్యుల సేవలు, దివ్య ప్రబంధం ప్రాధాన్యత తదితర అంశాలపై పరిశోధనా పత్రాలను సమర్పించి చర్చించనున్నారు.
జీయర్ స్వామిజీల ఆశీస్సులతో సదస్సు ప్రారంభం
ఈ సదస్సు ఆగస్టు 17 ఉదయం 10 గంటలకు తిరుమల పెద్ద జీయర్ స్వామీజీ, చిన్న జీయర్ స్వామీజీల ఆశీస్సులతో ప్రారంభమవుతుంది.
మూడు రోజుల పాటు ప్రతిరోజూ ఉదయం 10 గంటల నుంచి మధ్యాహ్నం 1 గంట వరకు, మధ్యాహ్నం 2 గంటల నుంచి సాయంత్రం 5.45 గంటల వరకు సదస్సు సమావేశాలు నిర్వహించనున్నారు.
శ్రీ వైష్ణవ ఆధ్యాత్మిక, వైజ్ఞానిక వారసత్వానికి ప్రాధాన్యత
శ్రీ వైష్ణవ సంప్రదాయం గొప్ప వారసత్వాన్ని ప్రస్తుత తరానికి పరిచయం చేయడంతో పాటు, ఆ సంప్రదాయంలోని ఆధ్యాత్మిక, పాండిత్యపరమైన విశిష్ట సేవలను ప్రజలకు తెలియజేయడం ఈ జాతీయ సదస్సు ప్రధాన లక్ష్యమని నిర్వాహకులు తెలిపారు.
💬 వ్యాఖ్యలు