సనాతన ధర్మ పరిరక్షణలో అర్చకుల పాత్ర కీలకం: టీటీడీ జేఈవో డా. ఎ. శరత్

తిరుపతి, నవంబర్ 5, 2026: ఆలయాలకు, సమాజానికి అర్చకులు ఆధ్యాత్మిక వారధులుగా నిలుస్తూ సనాతన ధర్మ పరిరక్షణకు, హిందూ సంప్రదాయాల సంరక్షణకు కీలక పాత్ర పోషిస్తున్నారని టీటీడీ జేఈవో డా. ఎ. శరత్ అన్నారు.

తిరుపతిలోని స్వేటా (SVETA)లో అక్టోబర్ 22 నుంచి నవంబర్ 5 వరకు 15 రోజుల పాటు నిర్వహించిన అర్చక శిక్షణ కార్యక్రమం ముగింపు సమావేశంలో ఆయన ప్రసంగించారు. అర్చకత్వం పవిత్రమైన సేవ అని, ఆధ్యాత్మిక విలువలు, సంప్రదాయాలను భావితరాలకు అందించే బాధ్యత అర్చకులపై ఉందని పేర్కొన్నారు. భక్తి, క్రమశిక్షణ, అంకితభావంతో సమాజానికి సేవ చేయాలని అర్చకులకు సూచించారు.

అర్చక వృత్తిలోకి యువత రావాలి

శ్రీకాకుళం జిల్లా పలాసకు చెందిన శ్రీ చంటి సాఫ్ట్‌వేర్ ఉద్యోగాన్ని వదిలి అర్చకత్వాన్ని స్వీకరించడమే కాకుండా, తన స్వగ్రామంలో ఆలయ నిర్మాణానికి కృషి చేస్తున్నారని డా. ఎ. శరత్ అభినందించారు.

మరింత మంది యువత ముందుకు వచ్చి ధార్మిక సేవలో భాగస్వాములు కావాలని ఆయన ప్రోత్సహించారు.

అర్చకులకు పూజా సామగ్రి, పుస్తకాలు, సర్టిఫికెట్ల పంపిణీ

15 రోజుల శిక్షణను పూర్తి చేసుకున్న అర్చకులకు ముగింపు కార్యక్రమంలో పూజా సామగ్రి, ఆధ్యాత్మిక పుస్తకాలు, సర్టిఫికెట్లు అందజేశారు.

టీటీడీ, హిందూ ధర్మ ప్రచార పరిషత్ ఆధ్వర్యంలో శిక్షణ

ఈ అర్చక శిక్షణ కార్యక్రమాన్ని టీటీడీ, హిందూ ధర్మ ప్రచార పరిషత్ సంయుక్తంగా, స్వేటా సహకారంతో నిర్వహించాయి.

ఈ కార్యక్రమంలో స్వేటా డైరెక్టర్ డా. వేమా వెంకటరత్నం, ఇతర అధికారులు పాల్గొన్నారు.